1535596 342949892511058 1044415530 n

"এই চেংৰী আকবাৰ ভালাপায়া দেখবি
নাকি ?"

(পত্থম খণ্ড)

এই চেংৰী আকবাৰ ভালাপায়া দেখবি
নাকি ?

আচ্ছা,
হিন্দী ছিনেমাৰ
মতোন কেনে নাহায় কথাগুলা
কলেজেৰ ঘাটাত
আমা দুয়ো ধাক্কা খামু
হাতেৰ থাকিয়া
সৰিয়া পৰিবো বই
আখান আখান
কৰিয়া
মুঁই তুলিয়া দিম
তাৰ পৰে গান,
তাৰ পৰে প্ৰেম,
মাজে মাজে ফাইট
বাহ কি মস্তী

সাল্লা হিন্দী ছিনেমা,
হিন্দী ছিনেমাৰ মতো কেনে নাহায় কথাগুলা

কতো মেহনত কৰ্ছুং
অ'ৰ পাছত
পেন্টেৰ সাথত
মিলিয়া পিন্ধিছুং
টি-সার্ট
ক্লিন ছেভ মুখত
ঘঁসছুং,
ফেয়াৰ এণ্ড লাভলী
পাসুৰিয়া গেছুং
অশ্লীল গালি গালাজ
মুখস্ত কৰ্ছুং গালিবেৰ শ্বায়েৰী
ব্লেড দিয়া কাটিয়া
হাতত লেখছুং H+H
অ'য় বেয়াপাব জন্যেয় ছাড়িআ দিছুং শিখৰ, ছিগৰেট

হিন্দী ছিনেমাৰ মতো কেনে, কেনে নাহায় কথাগুলা
আমাগুলাৰ পাশতো আকদিন
প্ৰমিকা থাকিব
এগুলা কি
পঞ্চতন্ত্ৰেৰ কিচ্ছা
প্ৰেমেৰ ৰণাঙ্গনত আমাগুলাৰ জৈন্যে
ডাক্তৰ-ইঞ্জিনিয়াৰ
গুলানে প্ৰধান শত্ৰু

মা কসম, একজনকো দেখিবাৰ নাপাই
সব বুক
"আই এম এনগেজ"
আব্বে টেলিফোন
নাম্বাৰ নাকি
থোৰি দেৰ বাদ
ডাইল কৈৰ্লে পায়া
যামু

আমা নাজানি
আর্চিচ কার্ডেৰ
সভ্যতা
নাজানি প্ৰেমেৰ
জৈন্যে কেনে লাগে
পার্কেৰ আন্ধাৰ আককোণা
নাজানি ইংলিশ-কামতাপুৰীৰ
খিচিৰী ভাষা
সত্য অর্থত আমা
মস্ত গোআৰ
খালি মদ খাবাৰ
জানা
ভবিষ্যতহীন নষ্ট
চেংৰা

এই চেংৰী আকবাৰ ভালাপায়া দেখিবাৰ
পাইস
হয়তো পায়া যাবাৰ
পাইস
জীবনেৰ অন্য মজা
হাই-হেল্লোৰ দুনীয়াক লাত্থি মাৰেক
আমা দিবাৰ পাই
বিন্দাছ পৃথিবীৰ
ঠিকিনা

বেকাৰ চেংৰা,
পার্ছত পইসা
নাথাকিলেও
হৃদয়বান
কিবা জোশ উঠিলে গোটায় পানবাজাৰখানকেয়
দিয়া দিম বার্থডে
গিফট্

এই চেংৰী আকবাৰ ভালাপায়া দেখবি
নাকি ?


(দ্বিতীয় খণ্ড)

ঘুমিয়া পৰা
এই সহৰেৰ মুঁয়েয়
জিতা-জাগতা
ৰোমিঅ'
আওয়াৰা-পাগল-
দীবানা
'বি মাই ভেলেন্টাইন' বুলিয়া কোবাৰ নাশিকিলুং
আমাৰ যে খালি
আকটায় আন্দাজ
এই চেংৰী আকবাৰ ভালাপায়া দেখবি
নাকি ?
মুঁই তোৰ প্ৰেমিক
ভিক্ষাৰী নাহোং
মাই ডিয়েৰ
খুচুৰা পইসা আকটা পাইলেই সন্তুষ্ট হোআ স্বায়ত্ত শাসন দিয়া
আমাৰ মন নাভৰে
সার্বভৌমত্বৰ দাবীত অচল-অটল ।

সন্ধিৰ পতাকা নিয়া
নাসা পর্য্যন্ত
চলিয়ায় থাকিবো
মোৰ টেলিফোনিক
যুদ্ধ
আকটা বিদ্ৰোহী
মিছিলেৰ সমান
উত্তেজনা নিয়া
তোৰ হোষ্টেলেৰ
আগিলা দিয়া
বাহেৰ সাথত
মোৰ পায়চাৰী
অভিযান ।

কলেজেৰ ওয়াল,
ডেক্স-ব্লেকবো­র্ড
সগঠেইতে
লেখিয়া থৈম শ্লোগান
হিমাংশু এণ্ড হিমাদ্ৰী
মেড ফৰ ইচ আদাৰ ।
পাৰ হোয়া যাওয়া
ঘাটাত
তুই ঘূৰিয়া
নাদেখিলেও,
তোকেয় শুনিয়া কৈম
এই চেংৰী আকবাৰ ভালাপায়া দেখবি
নাকি ?

আৰ দক্ষ প্ৰশাসকেৰ মতোন কৰিয়া
তুই দমন কৰিয়া আচ্ছিস মোৰ
গণতান্ত্ৰিক অধিকাৰ
কঠিন হাত দিয়া
মছৰেয়া দিছিস ভালপাওয়াৰ
স্মাৰকপত্ৰ
তোৰ তীক্ষ্ন শব্দেৰ
লাঠি চার্জ দিয়া
ব্যর্থ কৰিবাৰ চাছিস মোৰ সমস্ত ইমোশ্বনেল ট্ৰেজেডী।

কলেজ কৰিডোৰত
মোক দেখিয়া তোৰ সহেলীকয়জনেকৰে ফিচিঙা-ফিচিঙি
মুঁই সহ্য কৰ্ছুং―
সহ্য কৰ্ছু
কান্দোআ গেছেৰ প্ৰতিৰোধ ।

ঐদিন তোক
কাৰ জানি
বাইকেৰ পাছত
দেখিয়া
পেটত মোৰ ভাত
নাযোআ হৈল
যুদিওবা মুঁই জানুং
'মেংগো ফ্ৰুটি' খাওয়েয়া
তুই নাসিস মোৰ
ভোক হৰতাল ভংগ কৰিবাৰ জৈন্যে
এমন লাগ্ছিল―
ৰাস্তাত টায়াৰ জ্বলেয়া যেন
ঢোলাই দিম
৪৮ ঘন্টীয়া
চাকা বন্দো ।

তোৰ প্ৰেমিক মুঁই
মুঁই শুনিবাৰ জৈন্যে নাৰাজ এমন বকবাচ ভাষণ
'আমা ভালা বাহে হোয়া থাকিবাৰ পাই ।'
স্বায়ত্ত শাসনেৰ কুনো দৰ্কাৰ নাই
সার্বভৌমত্বেৰ দাবীত অচল অটল ।

তোৰ হৃদয়েৰ সদনত গৃহীত নাহোআ পর্য্যন্ত মোৰ ভালাপাওয়াৰ
প্ৰস্তাব
তোৰ মন আকাশত
না-উৰা পর্য্যন্ত
কলিজাৰ ৰংদিয়া মাখা
মোৰ প্ৰেমেৰ পতাকা
পঞ্চবার্ষিকী নাহায়, জীবনজোৰা
পৰিকল্পনা দিয়া
সাঙুৰিয়া নালোআ
পর্য্যন্ত মোক তোৰ
সাথত

আকবাৰ-দুইবাৰ
নাহায়, হাজাৰ হাজাৰ বাৰ কৈম
ভালাপাং তোক
ভালাপাং তোক
'বি মাই ভেলেন্টাইন' বুলিয়া কোবাৰ নাশিকিলুং
আমাৰ যে খালি
আকটায় আন্দাজ
এই চেংৰী আকবাৰ ভালাপায়া দেখবি নাকি ?

মূল:
হিমাংশু প্ৰসাদ দাস
(৯৭০৭০-১৫৪৯৬)
বুলিবদল:
কন্দর্পজিৎ কল্লোল
(৮৭৪৯৯-০৪৮৩৮)


80s toys - Atari. I still have